Gloukoom is ‘n groep oogsiektes wat skade aan die oog se optiese senuwee veroorsaak, gewoonlik as gevolg van te veel druk in die oog. Dit word die stille dief van sig genoem, omdat daar dikwels geen sigbare simptome is voordat daar ‘n groot verlies aan sig is nie. Die skade is ongelukkig meeste kere onherstelbaar teen die tyd dat daar simptome is.
Die eerste stadium van gloukoom begin dikwels met verhoogde druk in die oog, ook bekend as intraokulêre druk (IOD). Nie almal met ‘n hoë IOD ontwikkel gloukoom nie, en omgekeerd: party mense met ‘n normale IOD kan dit nog steeds kry. Dit beteken gereelde oogondersoeke is noodsaaklik om die toestand vroeg op te spoor.
Tydens hierdie ondersoeke sal jou oogspesialis jou oogdruk nagaan, jou optiese senuwee ondersoek, jou perifere visie toets, en meet hoe dik jou kornea is. Hierdie toetse identifiseer gloukoom in die vroeë stadiums, wat dit moontlik maak om toekomstige sigverlies deur middel van behandeling te voorkom.
In die pre-gloukoomstadium kan ‘n mens ‘n verhoogde oogdruk hê, asook veranderinge in die optiese senuwee, maar nog geen merkbare sigverlies of ander simptome nie. Hierdie stadium wys hoe belangrik gereelde oogondersoeke is, veral vir diegene met ‘n hoër risiko, soos mense met ‘n familiegeskiedenis van gloukoom of as jy ouer as 60 is.
Soos wat gloukoom vorder, kan dit jou perifere visie begin beïnvloed. In die vroeë stadiums sal jy dikwels geen verandering in jou visie opmerk nie, want jou sentrale visie bly onveranderd. Daar kan egter hier en daar ‘n blinde kol aan die buitenste rand van jou gesigsveld ontstaan. Jy sal gewoonlik nie hierdie blinde kolle opmerk terwyl jy jou daaglikse aktiwiteite verrig nie, maar dit kan deur gespesialiseerde toetse opgespoor word wanneer jy vir ‘n oogondersoek gaan.
Teen die tyd dat gloukoom die matige stadium bereik, begin dit meer opvallend raak dat jou visie aangetas is. Jy kan nog meer perifere visie verloor, wat dit moeiliker kan maak om goed te doen soos bestuur en jou weg vind in deurmekaar of besige plekke. In hierdie stadium is dit uiters belangrik om die behandelingsplan te volg wat jou oogkundige voorgeskryf het sodat jy die siekte se vordering kan vertraag en die visie wat jy oorhet, kan bewaar.
Gevorderde gloukoom veroorsaak ernstige perifere sigverlies, wat lei tot tonnelvisie, met slegs ‘n klein bietjie sig wat in die middel oorbly. Daaglikse take word al meer kompleks, en jy sal dalk hulp nodig hê om aktiwiteite veilig uit te voer. Voortgesette behandeling kan help om verdere sigverlies te voorkom.
Eindstadium-gloukoom is die ernstigste vorm van die siekte. Jou perifere visie is nou amper heeltemal verlore en jy het nog net ‘n klein sentrale area van sig oor. In hierdie stadium word jy wettig as blind beskou. Alhoewel behandeling nie bestaande skade kan omkeer nie, kan dit help om simptome te bestuur en verdere agteruitgang te voorkom.
Gloukoom kan nie genees word nie, maar as jy dit vroeg opspoor en behandel, kan jy heelwat doen om te keer dat dit verder vorder. Jy kan ook die risiko van gevorderde komplikasies verminder. Afhangende van hoe ernstig die probleem is, kan die opsies vir behandeling voorgeskrewe oogdruppels, mondelinge medikasie, laserterapie of chirurgie insluit.
Behalwe vir mediese intervensies kan jy gloukoom ook bestuur deur ‘n gesonde leefstyl te volg. Volg ‘n gebalanseerde dieet, oefen gereeld, moenie rook nie, en beskerm jou oë teen beserings – dit kan alles tot algehele ooggesondheid bydra.
Onthou, jou sig is kosbaar, en as jy gloukoom vroeg genoeg opspoor, kan jy onomkeerbare skade voorkom.
MedSeker verstaan die unieke waardes, kultuur en behoeftes van Afrikaanse gesinne. Daarom het ons bekostigbare, betroubare medieseversekeringplanne vir die Afrikaanssprekende gemeenskap ontwerp – wat vir jou gemoedsrus gee wanneer dit regtig saak maak.
Of jy nou ‘n hardwerkende individu of ‘n groeiende gesin is, as jy gebalanseerde dekking soek, praat met MedSeker vir opsies wat jou leefstyl, jou begroting en jou taal respekteer.
Besoek ons op Facebook.
